പെട്ടന്ന് എഴുതി തീർത്ത കഥ - 3

അമേരിക്കയിലു ഭർത്താവിനോപ്പം എത്തിയ ശേഷം എന്നും ഉഷ കരഞ്ഞിരുന്നു. പ്രകാശൻ അവളെ എന്തിനും ഏതിനും ഒരുപാടു ചീത്ത പറഞ്ഞിരുന്നു, മുടിയിൽ ഇത്ര എണ്ണ വേണ്ട, വെള്ളം കുടിക്കുമ്പോൾ ഒച്ച കേപ്പിക്കല്ലേ, ചെരുപ്പിട്ടു വീട്ടിൽ നടക്കു, ഈ സെറ്റ്‌ മുണ്ടൊക്കെ മാറ്റി, റ്റൈറ്റ്‌-സു മതി വീട്ടിൽ, യെസ്‌ യെസ്‌ ന്നു പറയാതെ, യെപ്‌ യെപ്‌ ന്നു പറയൂ, തൈരു കൂട്ടി കൈകൊണ്ടു കുഴച്ചു അളി പിളി ആക്കി, വിരലുകക്കിടയിലൂടെ ചാടിച്ചു നക്കി തുടച്ചു ഉണ്ണല്ലേ, സ്പൂൺ വച്ചു ഉണ്ണൂ, എരിവു കൂടുമ്പോൾ, ഈശ്‌.... ഈശ്‌.. എന്നു ഒച്ച വെക്കല്ലേ, ഈ കോപ്രായം ഒക്കെ നിർത്തൂ. അങ്ങനെ പലതും കേക്കുമ്പോൾ അവൾ കർട്ടനു പിന്നിൽ നിന്നു തേങ്ങി കരയും. എല്ലാം മെല്ലെ ശരിയാക്കാം, എന്നാലും, തൈരും, അമ്മ തന്ന കടുമാങ്ങയും ചോറും കുഴച്ചു ഉണ്ണാതേ എങ്ങനെയിരിക്കും? അന്നൊരുദിനം, പ്രകാശൻ ഉറങ്ങിയ ശേഷം, അവൾ അടുക്കളയിൽ വന്നു, പതുക്കെ തട്ടത്തിൽ ചോറിട്ട്‌, തൈരു കമത്തി, കടുമാങ്ങ കൂട്ടി, ആരെയും പേടിക്കാതെ, നക്കി തുടച്ചു, ഒരുപാട്‌ ഈശ്‌... ഈശ്‌.... ശബ്ദത്തോടെ, അവളുണ്ടു വയറു നിറയേ. ഉറങ്ങി കിടക്കുന്ന പ്രകാശൻ ഈ ശബ്ദങ്ങൾ ഒന്നും കേട്ടില്ലാ, എല്ലാ ശബ്ദങ്ങളും അവന്റെ കൂർക്കം വലിയിൽ അലിഞ്ഞു ചേർന്നിരുന്നു.